Ólöf og Omry kunna að halda páskaboð

Ólöf og Omry kunna að halda páskaboð

Ólöf og Omry kunna að halda páskaboð

Hjón­in Ólöf Ein­ars­dótt­ir og Omry Avra­ham, eig­end­ur Krydd­húss­ins, hafa unun af því að búa til góðan mat. Þeirra mat­reiðsla er oft­ar en ekki und­ir áhrif­um frá Mið-Aust­ur­lönd­um þar sem Avra­ham er frá Ísra­el. Hér ætla þau að deila sinni páska­máltíð með les­end­um Morg­un­blaðsins.

„Mér finnst gam­an að halda í hefðir þegar kem­ur að mat og þess vegna er lamba­læri ómiss­andi yfir pásk­ana,“ seg­ir Ólöf en hún og eig­inmaður henn­ar, Avra­ham, settu sam­an sína draumapáska­máltíð. Það er ekki annað en hægt að fá vatn í munn­inn við að lesa þess­ar upp­skrift­ir en yfir þeim er nokk­ur æv­in­týraljómi.„Þar sem Avra­ham er mjög liðtæk­ur í eld­hús­inu er okk­ar mat­ar­gerð und­ir ísra­elsk­um áhrif­um. Mér finnst meðlætið skipta máli ekki síður en sjálf­ur aðal­rétt­ur­inn þannig að við erum alltaf með þó nokkuð af vel krydduðum meðlæt­is­rétt­um þegar við eld­um veislu­mat. Pikkluðu sinn­eps­fræ­in, kar­meliseraða hvít­kálið og sal­at­dress­ing­una má gera deg­in­um áður til að spara tíma,“ seg­ir hún.

Páskalambið

½ stauk­ur Yfir holt og heiðar frá Krydd­hús­inuólífu­olía, salt og pip­ar

Kryddið lærið vel með Yfir holt og heiðar-krydd­blönd­unni, dreypið aðeins af olíu yfir allt sam­an og nuddið krydd­inu vel á lærið. Gott að krydda lærið dag­inn áður og láta það hvíla í ís­skáp þar til það er eldað. Hitið ofn­inn í 200°C. Setjið lærið í steikarpott eða ofnskúffu og saltið og piprið vel. Ofn­steikið í 45 mín við 200°C. Takið þá lærið út, gott að taka soðið frá fyr­ir sós­una. Pakkið lær­inu inn í bök­un­ar­papp­ír og því næst álp­app­ír yfir allt sam­an og lokið það vel af með álp­app­írn­um. Setjið lærið aft­ur inn í ofn­inn í aðra 2½ klst.

 

Rjómasós­an

½ lauk­ur, fínsaxaður og u.þ.b. 50 g smjör sett í pott. Leyfið laukn­um að mýkj­ast í smjör­inu í dágóða stund. Bætið eins og 3 msk af hveiti út í pott­inn og hrærið vel sam­an við.

Leysið upp einn sveppakraftsten­ing í glasi af soðnu vatni og hellið út í pott­inn ásamt soðinu af lær­inu. Hellið rjóma út í og látið sós­una sjóða niður. Bragðbætið með eins og 2 msk. af blá­berja­sultu, aðeins af rauðvíni (eða öðru áfengi) og kryddið hana til með rósapip­ar og salti. Bætið við rjóma þar til ákjós­an­leg þykkt og áferð á sós­unni næst.

Ofn­bakað grasker með tahini og za’at­ar

1 grasker, kjarn­hreinsað og skorið í grófa bita1 rauðlauk­ur, skor­inn í báta eða skíf­ur

ólífu­olía

salt og pip­ar

u.þ.b. 3 msk. tahini (ses­am­s­mjör)

safi úr hálfri sítr­ónu

vatn

hálf­ur hvít­lauks­geiri, kram­inn

30 g furu­hnet­ur

1 msk. Za’at­ar frá Krydd­hús­inu

lúku­fylli af stein­selju, grófskor­in

Hitið ofn­inn í 220°C. Skerið graskerið til helm­inga, endi­langt, og kjarn­hreinsið. Skerið það í grófa bita. Skerið rauðlauk­inn í báta/​skíf­ur og setjið í skál ásamt grasker­inu. Dreypið aðeins af ólífu­olíu yfir, saltið vel og piprið og nuddið vel á græn­metið. Setjið græn­metið í ofnskúffu og ofn­bakið í 30-40 mín. Passið að lauk­ur­inn brenni ekki áður en graskerið er til­búið. Takið úr ofn­in­um og setjið til hliðar. Ristið furu­hnet­urn­ar á pönnu með ör­lít­illi ólífu­olíu og ör­litlu salti. Gott er að hafa háan hita og hræra í svo til stöðugt og passa þannig að ekki brenni við. Setjið furu­hnet­urn­ar til hliðar á meðan þið gerið dress­ing­una. Hrærið sam­an tahini, sítr­ónusafa og vatni í skál ásamt hvít­laukn­um og saltið ör­lítið. Þetta á að vera á vera þannig á þykkt­ina að hægt sé að hella þessu með góðu móti yfir græn­metið. Stráið za’at­ar og stein­selj­unni yfir græn­metið, hellið tahini­dress­ing­unni yfir allt sam­an og stráið furu­hnet­un­um að síðustu yfir áður en borið fram.

 

Kryddaðar kart­öfl­ur í brenndu smjöri

Litl­ar kart­öfl­ur1 tsk. túr­merik

½ tsk. paprika

50 g smjör

tzatziki-krydd­blanda frá Krydd­hús­inu

salt og pip­ar

Sjóðið kart­öfl­urn­ar með hýðinu. Ég vel litl­ar kart­öfl­ur og sýð þær í litlu vatni þannig að það rétt þeki þær og set túr­merik og papriku út í vatnið. Það gef­ur bragð og lit í kart­öfl­urn­ar. Takið kart­öfl­urn­ar úr vatn­inu áður en þær eru al­veg full­soðnar og leggið til hliðar. Bræðið smjörið á pönnu við háan hita. Leyfið því að brenna aðeins og setjið þá kart­öfl­urn­ar út í og veltið þeim upp úr smjör­inu. Að lok­um kryddað með tzatziki, salti og pip­ar. Smart að merja þær aðeins á pönn­unni með kart­öflustapp­ara ef maður vill.

Kar­meliserað hvít­kál með kummíni og eini­berj­um

100 g syk­ur50 g smjör

u.þ.b. 75 ml rjómi

½ hvít­káls­höfuð, skorið í strimla

1 msk. eini­ber

1 tsk. kummín

salt og pip­ar

Sjóðið sam­an syk­ur og smjör í potti þar til það kar­meliser­ast. Passið að hræra stöðugt í til að ekki brenni við. Lækkið aðeins hit­ann, hellið rjóm­an­um út í og hrærið vel sam­an við. Setjið hvít­káls­strimla, eini­ber og kummín út í og látið sjóða í leg­in­um í 10-15 mín. eða þar til hvít­kálið er orðið soðið í gegn og lög­ur­inn soðinn niður. Saltið og piprið eft­ir smekk. Lög­ur­inn (ef ein­hver er) er sigtaður frá áður en borið fram.

Pikkluð sinn­eps­fræ

„Þessi upp­skrift kem­ur frá vini okk­ar, mat­reiðslu­meist­ar­an­um Jó­hanni Inga Reyn­is­syni. Þau eru frá­bær með lamb­inu og einnig er gam­an að eiga þau inni í ís­skáp sem meðlæti með hvers kyns mat og brauði,“ seg­ir Ólöf.

250 ml borðedik150 g syk­ur

75 ml vatn

1 tsk. anís­fræ

1 kar­dimomma (gott að merja hana aðeins í hýðinu og opna hana þannig)

1 tsk. rós­marín, þurrkað eða ferskt

1 tsk. timí­an, þurrkað eða ferskt

2 stauk­ar sinn­eps­fræ (eða 130 g)

Allt nema sinn­eps­fræ­in sett í pott og soðið upp. Látið sjóða þar til syk­ur­inn hef­ur leyst upp eða í bil 5-10 mín. Hellið heit­um leg­in­um yfir sinn­eps­fræ­in og látið kólna við stofu­hita í lokuðu íláti. Geym­ist vel í lokuðu íláti á köld­um stað. Sinn­eps­fræ­in eru síuð frá leg­in­um þegar þau eru bor­in fram. Gott að gera þetta a.m.k. degi áður til að fræ­in mýk­ist og krydd­bragðið njóti sín til fulls.

Spari-sítrus-sal­at­dress­ing með basilíku og vanillu

„Við borðuðum hjá Jó­hanni Inga Reyn­is­syni mat­reiðslu­meist­ara ný­lega og ég kol­féll fyr­ir þess­ari sal­at­dress­ingu hans sem ég kalla spari­dress­ingu þar sem hún inni­held­ur syk­ur en hún er al­gjör­lega þess virði þegar maður vill gera vel við sig,“ seg­ir hún.

100 g syk­ursafi úr 2 sítr­ón­um

safi úr 1 app­el­sínu

safi úr 1 límónu

½ vanillu­stöng

1 tsk. basilíka þurrkuð

Bræðið syk­ur­inn í potti með ör­litlu vatni eða eins og 4 msk. Gott að standa yfir þessu og hræra í á meðan syk­ur­inn er að leys­ast upp til að ekki brenni við. Þegar syk­ur­inn er bráðnaður er ávaxta­safa og kryddi bætt út í. Gott að skafa kjarn­ann úr vanillu­stöng­inni út í pott­inn og setja líka hýðið eða sjálfa stöng­ina út í. Leyfið þessu að sjóða svo­lítið, takið síðan af hell­unni og látið kólna. Gott að sigta vökv­ann frá krydd­inu þegar dress­ing­in er orðin köld. Upp­runa­lega upp­skrift­in seg­ir að hella eigi bragðlausri olíu út í í smá­um skömmt­um og blanda vel sam­an með töfra­sprota. Ég sleppi því en ég dreypi alltaf ólífu­olíu á sal­atið ásamt aðeins af grófu salti og er svo með dress­ing­una á borðinu þannig að hver og einn geti hellt henni yfir sal­atið sitt. Þessi dress­ing geym­ist vel í lokuðu íláti á köld­um stað.